Мулоқоти Ш. Саид бо Ф.Масопуст
Душанбе, 28.11.2014. (АМИТ «Ховар» ).- 27 ноябр раиси Палатаи савдо ва саноати Тоҷикистон Шариф Саид бо ҳайати тоҷирони Чехия бо роҳбарии раиси иҷроия, узви раёсати Палатаи савдо ва саноати Чехия оид ба кишварҳои ИДМ Франтишек Масопуст мулоқот анҷом дод.
Тавре ки аз ПСС ҶТ хабар доданд, мақсади асосии мулоқот иборат аз рушди ҳамкории иқтисодию тиҷоратии ҳар ду давлат, ҳамчунин имзои созишномаи байни палатаҳо дар бораи ҳамкорӣ буд.
Мулоқот дар ҳошияи сафари расмии Президенти Чехия Милош Земан ба Тоҷикистон, ки онро ҳайати тиҷоратию иқтисодии 70 ширкати Чехия ҳамроҳӣ мекард, сурат гирифт.
Қобили зикр аст, ки соли 2013 муомилоти моли байни Тоҷикистону Чехия 3,5 миллион долларро ташкил дод.
Франтишек Масопуст зикр намуд, ки аз рӯи натиҷаи ҳамоиши тоҷирону соҳибкорони Чехия ва Тоҷикистон қарордоду созишномаҳои нави байни соҳибкорони ҳар ду кишвар имзо шуданд.
«Ин тадбир иқдоми наве дар роҳи рушду густариши ҳамкории байни ҳар ду кишвар хоҳад буд», — афзуд Франтишек Масопуст.