Нархи бензин баробари 20 дирам қимат шуд

Душанбе, 18.11.2014. (АМИТ «Ховар», Екатерина Пасторова).- Рӯзи ҷумъаи гузашта дар нуқтаҳои маводи сӯхти шаҳр нархи намудҳои асосии бензин баробари 20 дирам қимат шуд. Алҳол «Газпромнефти Тоҷикистон» нархи 1 литр бензини намуди АИ – 92 – ро 6 сомонию 50 дирам, 1 литр бензини намуди АИ – 92 «Ҷидрайф» — ро 6 сомонию 65 дирам, 1 литр бензини намуди АИ – 95 – ро 6 сомонию 80 дирам, АИ – 95 «Ҷидрайф» — ро 6 сомонию 95 дирам кардааст. Ҳол он ки то рӯзи ҷумъаи гузашта нархҳои зикршуда баробари 20 дирам арзон буданд.Дар ширкати « Газпромнефти Тоҷикистон» сабаби инро чунин маънидод карданд, ки имрӯзҳо ба Тоҷикистон бензини бебоҷ ворид нашуда, сӯзишворӣ бо нархҳои дигар дастрас гардида ва бо нархи қимат фурӯхта мешавад. Ба гуфтаи намояндаи ширкати мазкур баландшавии қурби асъори Амрико низ ба арзиши ниҳоии бензин таъсир мерасонад.