Парафшонии Парчами давлатӣ дар Тавилдара

Душанбе, 25.11.2014. (АМИТ «Ховар», Мавҷуда Анварӣ).-Рӯзи Парчами давлатиро чун дигар мардуми гӯшаву канори кишвар сокинони ноҳияи зебоманзари Тавилдара низ бо шукӯҳи хосса таҷлил намуданд.
Тибқи иттилои мудири бахши фарҳанги ин ноҳия Сабоҳат Қурбонова, дар ин рӯзи фархунда дар майдони марказӣ чорабинии фарҳангию фароғатӣ баргузор гардид ва дар он раиси ноҳияи Тавилдара Ҳиммати Ғайрат мардуми шарафманди ин минтақаро бо Рӯзи Парчами давлатӣ табрик намуда, роҷеъ ба аҳамияти Парчами давлатӣ ва нақши он дар давлатдорӣ зикр кард, ки: «Мутобиқи Конститутсия (Сарқонун)-и Ҷумҳурии Тоҷикистон Парчам, Нишон ва Суруди миллӣ рамзҳои асосии давлат мебошанд. Дар таърихи нави инсоният ин се падидаи ҷамъияти инсонӣ нишонаи соҳибихтиёрӣ ва соҳибистиқлолии ҳар як давлату миллат ба ҳисоб мераванд.
Парчам дар ҳаёти ҳар як давлату миллат мавқеъ ва нақши хоси худро дорад. Парчами давлатӣ ифодагари мақсаду маром ва орзую ормонҳои ҳар як миллату давлат аст ва ин мақсаду маром бо ранг ва нақшҳои хос дар он таҷассум ёфтаанд».
Дар чорабинӣ инчунин аз ҷониби ҳунармандони Кохи фарҳанги ноҳия баҳри болидахотирии иштирокдорон ва дар сатҳи баланд таҷлил намудани ин санаи таърихӣ барномаи консертӣ намоиш дода шуд.