Таҳкими робитаҳо байни доираҳои соҳибкории Дания ва Тоҷикистон

Душанбе, 19.11.2014 (АМИТ «Ховар», Мавҷуда Анварӣ).- Сафири фавқулода ва мухтори Шоҳигарии Дания Томас Винклер баъди супоридани эътимодномаи худ ба Президенти Ҷумҳурии Тоҷикистон дар ҳузури хабарнигорон изҳор намуд, ки хоҳони тақвияти бештар касб намудани ҳамкорӣ ва муносибатҳои байни Ҷумҳурии Тоҷикистон ва Шоҳигарии Дания дар оянда мебошад. Томас Винклер аз ҳамкориҳои ҳарду кишвар, ки имрӯз дар ҳама арсаҳои мавриди таваҷҷуҳи тарафайн рӯ ба рушданд ёдовар шуда, зикр кард, ки агар аз лиҳози сиёсӣ ба харитаи ҷаҳонӣ нигарем, аз лиҳози ҷойгиршавии ҷуғрофии Тоҷикистон чунин бармеояд, ки Шоҳигарии Дания то чӣ андоза бо Тоҷикистон ҳамкориву ҳамёрии зичро ба роҳ мондааст. «Шоҳигарии Дания омода ҳаст ва тасмим дорад, то ки ҳамкориҳои худро дар самти мубориза алайҳи терроризм, гардиши ғайриқонунии маводи мухаддир ва дигар падидаҳои вобаста ба амният, ки ба амнияти ин минтақа ва ҷаҳон дар сатҳи ҷаҳонӣ таъсир мерасонанд, ҳамкории зичу густурда дошта бошад. -Нуқтаи дигари таваҷҷӯҳи хоси ман зимни татбиқи рисолати худ ба ҳайси сафир- ин таҳкими бештар бахшидан ба муносибат ва робитаҳо байни доираҳои соҳибкорӣ ва ширкатҳои Шоҳигарии Дания ва Ҷумҳурии Тоҷикистон дар самту арсаҳои кишоварзӣ, сарфаи неруи барқ, истифодаи самаранок ва оқилони неруи барқ, инчунин тавлиди неруи барқи аз лиҳози экологӣ тоза мебошад»-, илова намуд Сафири Шоҳигарии Дания.