Ҷоиза ба рӯзноманигори беҳтарин

Душанбе, 26.12.2014. (АМИТ «Ховар», Покизаи Шодмон). — Натиҷаҳои озмуни қаблан эълонгардида доир ба инъикоси раванди татбиқи «Стратегияи баланд бардоштани сатҳи некӯаҳволии мардуми Тоҷикистон (СБСНМТ) барои солҳои 2013-2015», ки аз ҷониби Вазорати рушди иқтисод ва савдо дар ҳамкорӣ бо Барномаи рушди СММ миёни намояндагони васоити ахбори оммаи ватанӣ эълон шуда буд, баргузор гардид.
Ба иттилои Вазорати рушди иқтисод ва савдои ҷумҳурӣ дар ҷамъомади мазкур  муовини вазир Умед Давлатзод  баргузории озмунро ҷиҳати иттилоотонии ҷомеаи кишвар аз натиҷаҳои татбиқ гардидани стратегия ва барномаҳое, ки барои рушди соҳаҳои мухталифи иқтисод ва баланд бардоштани сатҳи некӯаҳволии мардум нигаронида шудаанд, хеле муҳим ва саривақтӣ арзёбӣ намуд.
Дар озмун, ки аз моҳи январи соли ҷорӣ шуруъ гардид, намояндагони васоити ахбори омма фаъолона ширкат варзида, бештар аз 40 маводро дар жанрҳои мухталифи журналистика пешниҳод намуданд. Баъди баррасии амиқи ҳайати ҳакамон, ки аз рӯзноманигорони касбӣ ва мутахассисони дахлдори вазорат иборат буд, беҳтарин мавод аз рӯи номгӯйҳои муайяншуда интихоб гардид.
Аз рӯи номгӯи “Маводи беҳтарини чопӣ” Неъматуллои Худойбахш аз рӯзномаи «Ҷумҳурият» ҷойи аввал ва Абдусаттор Абдуҷабборов аз «Садои Конибодом»ҷойи дуюмро соҳиб шуданд. Ғолиби номгӯи “Беҳтарин маводи интернетӣ” Абдукарим Раҷабов -хабарнигори «Сомонаи Фараж» гардид. Дар номгӯи “Барномаи беҳтарини радиоӣ” ба Шоиста Раҳимова аз «Радиои Тоҷикистон»- ҷойи аввал, Раҳимҷон Аҳмедов аз «Садои Хуҷанд»- ҷойи дуюм ва Гулнора Насриддинова аз Радиои «Садои Душанбе»- ҷойи сеюм сазовор дониста шуд, инчунин дар номгӯи “Барнома-намоиши беҳтарини телевизионӣ” Муҳаммадраҷаби Ҳанафия аз шабакаи аввали ТВ Тоҷикистон ғолиб эълон гардид.