Китобхонаи миллӣ ниёз ба кумакҳои илмӣ дорад

Душанбе, 29.12.2014. (АМИТ «Ховар», Раъно Нусратуллозода).-26 декабр  дар Китобхонаи миллии Тоҷикистон бо ташаббуси директори китобхона Сайфиддин Назарзода бо иштироки мутахассисон ва олимони соҳаи китобдорӣ ва иттилоотшиносӣ  нишасти илмӣ доир  гардид, ки дар он  олимони соҳа профессор Сафар Сулаймонӣ,  номзадҳои илмҳои педагогӣ  Шарифҷон Тошев, Сафар Шосаидов, Қурбоналӣ Бӯриев, Қурбоналӣ Афғонов, Сайфиддин Камолзода барои рушди минбаъдаи Китобхонаи миллӣ ва соҳаи китобдорию иттилоотшиносӣ ибрози назар намуданд.
           Дар гузориши профессор Сафар Сулаймонӣ     ва номзади илмҳои педагогӣ  Сафаралӣ Шосаидов ба таври мушаххас роҳкорҳои навини соҳа  мавриди баҳрабардорӣ қарор гирифт. Аз ҷумла, ишора гардид, ки зарурати таъсиси Донишкадаи китобдорӣ ва иттилоотшиносӣ бо коллеҷи китобдорӣ ва иттилоотшиносӣ  ба миён омадааст;  тарбияти неруи инсонӣ- китобдорон ва иттилоотшиносони мутахассис дар сатҳи кордонӣ, коршиносӣ, коршиносии аршад (магистр) ва докторӣ бояд роҳандозӣ гардад.
            Минбаъд кулли пажӯҳишҳои китобдорӣ ва иттилоотшиносӣ  бояд зери назари Китобхонаи миллӣ анҷом гирад: таҳқиқоти иҷтимоӣ оид ба масоили «Китоб дар фарҳанг ва зиндагии мардум», «Китоб ва мутолиот дар ҳаёти қишрҳои гуногун ва манотиқи гуногун» роҳандозӣ гардад.
             Зикр гардид, ки анҷумани китобдорони тоҷик таъсис шавад ва дар оянда анҷумани китобдорон ва иттилоотшиносони кишвар доир  шавад.  Ишора шуд, ки то ба ҳол меъёрҳои соҳаи китобдорӣ таҳия нагардидаанд ва онҳо ҳоло ҳам тибқи меъёрҳои замони шӯравӣ кор мекунанд. Бояд низомҳои навини китобдорӣ ва иттилоотшиносӣ барои китобхонаи миллӣ ва китобхонаҳои кулли кишвар таҳия гарданд.            Дар нишасти илмӣ директори китобхона Сайфиддин Назарзода роҳкорҳои дигари китобхонаро баршумурда, ибрози ақида кард, ки минбаъд ҳамкориҳо бо олимони соҳа роҳандозӣ мегарданд ва аз имкониятҳои неруи илмии олимони соҳа бамаврид истифода ва баҳрабардорӣ ба амал меояд.