Намоиши «Зиндагинома» бо иштироки аҳли фарҳанг
Душанбе, 17.12.2014. (АМИТ «Ховар», Зарангези Латиф).- Дирӯз дар Театри давлатии академии драмавии ба номи Абулқосим Лоҳутӣ нахустнамоиши спектакли «Зиндагинома» аз рӯи асари нависанда ва драматург Абдуғаффор Абдуҷабборов дар таҳияи Ҳунарпешаи халқии Тоҷикистои Давлат Убайдуллоев доир шуд.
Намоиши мазкур ба 100- солагии композитори барҷастаи тоҷик Зиёдулло Шаҳидӣ бахшида шуда, дар он намояндагони аҳли фарҳанг, дӯстдорони санъати волои мусиқӣ иштирок намуданд.
Зикр шуд, ки ҷашни 100-солагии композитор Зиёдулло Шаҳидӣ аз ҷониби ЮНЕСКО пазируфта шуда, дар як силсила кишварҳои олам ҳамовозӣ пайдо кардааст.
Ёдрас мешавем, ки Зиёдулло Шаҳидӣ, (1914-1985) композитори барҷастаи тоҷик, Ҳунарпешаи халқии Тоҷикистон, Лауреати мукофоти давлатии Тоҷикистон ба номи Абӯабдулло Рӯдакӣ, дастпарвари студияи миллии Консерваторияи давлатии Маскав, яке аз асосгузорони санъати касбии мусиқии тоҷик, муаллифи даҳҳо сурудҳои машҳур, аз ҷумла «Ватан-Ватан», «Зи сӯзи сина», «Иди Зафар», асарҳои симфонӣ, достонҳои вокалӣ-симфонӣ, кантатаву оратория, вокалӣ-хореографӣ, камеравӣ-созӣ барои намоишномаҳои театрӣ, филмҳои бадеӣ, операҳои шӯҳратёри «Комде ва Мадан» ва «Ғуломон» мебошад.