Рӯнамоии “Ҷоми саргардон”

 Душанбе, 25.12.2014. (АМИТ «Ховар»). — Ахиран дар Маркази миллии ҷумҳурии Ӯзбекистон, дар шаҳри Тошканд рӯйнамоии китоби тозанашри нависандаи тоҷикзабони Ӯзбекистон — Юнуси Имомназар, ки бо номи “Ҷоми саргардон” аз тариқи нашриёти “Tamaddun” ба чоп расидааст, баргузор шуд. Дар нишаст як идда равшанфикрони тоҷику ӯзбек ва кормандони сафорати Тоҷикистон, ки дар Тошканд фаъолият доранд, иштирок намуданд.
Китоби ёдшуда ду қисса ва чанд достони кӯтоҳи нависандаро дар бар мегирад, ки ҳама хонданбоб буда, мавзӯъҳои мухталифро перомуни ҳаёти имрӯзаи инсонҳо, мушкилоти рӯзгор, лаҳзаҳои шоду андӯҳбор, андешаю тасаввуроти ранг ба ранги одамони гуногунро пӯшида дар ҷомаи бадеӣ фаро гирифтааст.
Имрӯз Юнуси Имомназар аз беҳтарин қаламкашони кишвари Ӯзбекистон ба шумор меравад ва дар рушду нумуи насри тоҷик саҳми арзанда мегузорад. Ӯ бо китоби “Аз санг сахт, аз гул нозук”-и худ кайҳо боз мухлисони зиёд пайдо кардааст.