ВКД: Кумаки моддӣ дар арафаи Соли нави мелодӣ
Душанбе, 22.12.2014. (АМИТ «Ховар», Муқаддас Темурзода).-Дирӯз бахшида ба фарорасии Соли нави мелодӣ бо ибтикори вазири корҳои дохилӣ Раҳимзода Рамазон Ҳамро ба мактаб — интернати рақами № 1-и шаҳри Душанбе, ки дар он ятимону бепарасторон ба таълиму тарбия фаро гирифта шудаанд, кумаки моддӣ, аз қабили орд, шакар, биринҷ, равған, картошка, сабзӣ, пиёз ва дигар маҳсулоти хӯрокворӣ расонида шуд.
ВКД ҶТ хабар медиҳад, масъулини мактаб барои чунин ташаббус ва ғамхорӣ ба роҳбарияти Вазорати корҳои дохилӣ изҳори миннатдорӣ намуда, иброз доштанд, ки тарбиятгирандагони муассисаи мазкур таҳти назорати доимӣ қарор дошта, ба омӯхтани илму дониш пурра фаро гирифта шудаанд. Қобили зикр аст, ки чунин иқдом дар арафаи ҳар иду чорабиниҳо аз ҷониби роҳбарияти Вазорати корҳои дохилӣ ба роҳ монда мешавад.