Вохӯрии директори АНМН бо ҳамоҳангсози Раёсати СММ

Душанбе, 25.12.2014 (АМИТ «Ховар», Муқаддас Темурзода).- 24 декабри соли 2014 директори Агентии назорати маводи нашъаовар (АНМН)-и назди Президенти ҶТ, генерал-лейтенанти милитсия Рустам Назарзода ҳамоҳангсози барномавии Раёсати СММ оид ба маводи нашъаовар ва ҷинояткорӣ Алӣ Сарияздиро бо сабаби ба итмом расидани муҳлати намояндагиаш дар Тоҷикистон ба ҳузур пазируфт.
Бино ба иттилои хадамоти матбуоти агентӣ дар вохӯрӣ директори агентӣ ба Алӣ Сарияздӣ барои фаъолияти пурсамар ва саҳми арзанда дар самти мубориза бо муомилоти ғайриқонунии маводи нашъаовар, инчунин барои мусоидати пайвастаи Намояндагии Раёсати СММ оид ба маводи нашъаовар ва ҷинояткорӣ ба Агентии назорати маводи нашъаовари назди Президенти ҶТ арзи сипос намуд.
Алӣ  Сарияздӣ фаъолияти сесолаи худро дар Тоҷикистон, аз ҷумла таҳияи барномаҳо ва лоиҳаҳоро дар самти мубориза бо муомилоти ғайриқонунии маводи нашъаовар, ҷиноятҳои муташаккили фаромиллӣ, қонунигардонии маблағҳои пулӣ, ки аз муомилоти ғайриқонунии маводи нашъаовар ба даст омадаанд, натиҷагирӣ намуд.
Дар фарҷоми вохӯрӣ Алӣ Сарияздӣ дар “Китоби меҳмонони фахрӣ” хотироти худро сабт намуд.