Ҳисор: Вохӯрӣ бо аҳли зиё

Ҳисор, 21.01.2015 ( АМИТ «Ховар», Ҳотами Шарифи),- Дирӯз раиси ноҳияи Ҳисор, узви Маҷлиси миллии Маҷлиси Олии Ҷумҳурии Тоҷикистон  Усмон Сабзов  бо  шоиру нависандагон   ва рӯзноманигорон  суҳбати  хосса доир  намуд.  Дар даврае, ки  дар тамоми  ноҳия  корҳои  созандагию бунёдкорӣ бо ҷӯшу хурӯш  идома доранд, раиси ноҳия қаламкашонро  даъват   намуд  корнамоию  заҳматҳои  фидокоронаи   бунёдкорону   мутахассисон  ва  кормандони  оддиро ҳамарӯза васф  намоянд, зеро имрӯз  дар як  вақт  дар 238 иншооти ҷашнӣ  корҳои  сохтмонӣ    бо маром идома  дошта,  76 иншоот  мавриди  баҳрабардорӣ қарор гирифтааст. Адибон  Султонмуроди Одина, Фатҳуллои  Азиз, Абдулҳамид Самадов, Қурбонмурод Асозода, Салоҳиддини Садр  дар  бораи   китобҳои  нашршуда  ва корҳои  оянда маълумот доданд.
Раиси ноҳия қаламкашонро  ба  ташаббускорӣ, эҷодкорӣ,  муттаҳиддӣ даъват  намуда, иброз  дошт, ки  ҳамаи мо бояд  дар якҷоягӣ   ҷашни 3 ҳазорсолагии Ҳисорро ба  таври арзанда  ва дар сатҳи  баланд  таҷлил намоем.