АНМН: мулоқоти созанда бар зидди нашъамандӣ

Душанбе, 23.01.2015. (АМИТ «Ховар», Муқаддас Темурзода).- Аз омори солонаи Вазорати тандурустӣ ва ҳифзи иҷтимоии аҳолӣ бармеояд, ки  нишондоди зиёди нашъамандон ба шаҳри Душанбе рост меояд, ки дар ин ҷо 3008 нафар нашъаманд ба қайд гирифта шудааст, аз ин миқдор 199 нафараш зан мебошад. 955 нафари онҳо истиқоматкунандагони ноҳияи Сино буда, аз ин шумора 33 нафараш зан аст. Ин нишондод нисбат ба дигар ноҳияҳои шаҳри Душанбе ду маротиба зиёд мебошад. Аз ин лиҳоз кормандони агентӣ бо истиқоматкунандагони маҳаллаи даҳуми ноҳияи Сино вохӯрӣ доир намуда, дар он зарари нашъамандӣ ва роҳҳои пешгирии онро баррасӣ карданд.
Дар вохӯрии мазкур кормандони агентӣ ба раиси маҳалла, духтурони маҳаллӣ ва муаллимону истиқоматкунандагон муроҷиат намуданд, ки ҳаёти кӯчагии ҷавонону наврасонро ба назорат гиранд, бо падару модари он нафароне, ки то бевақтии шаб дар кӯчаю хиёбонҳо мегарданд, ҳамсуҳбат шаванд, ба узру баҳонаи пешовардаи фарзандон бовар намуда, хотирҷамъ нагарданд.
Вохӯрӣ чун як суҳбати ошкоро доир гардида, иштирокчиён зимни суҳбат ба саволҳои худ аз мутахассисон ҷавоб гирифтанд. Баргузории ин гуна вохӯриҳо дар дигар маҳаллаҳои ноҳия низ ба нақша гирифта шудааст.
Дар ин бора аз Агентии назорати маводи нашъаовари назди Президенти Ҷумҳурии Тоҷикистон иттилоъ доданд.