Хуҷанд: Мулоқот бо соҳибкорон

Хуҷанд,21.01.2015. (АМИТ “Ховар”, Абдуаҳад Шарифзода).- Дирӯз шаҳрдори Хуҷанд Раҷаббой Аҳмадзода бо соҳибкорон мулоқот анҷом дод. Тавре ки ба хабарнигори АМИТ “Ховар” роҳбари маркази матбуоти раиси шаҳр Маҳмудҷон  Муҳаммадӣ  иттилоъ дод, дар вохӯрӣ наздик ба 100 нафар соҳибкори маҳаллӣ иштирок намуд. 
Ба гуфти манбаъ, шаҳрдори Хуҷанд доир ба саҳми соҳибкорони шаҳр ҳарф зада, зикр намуд, ки алъон дар ҳудуди шаҳри Хуҷанд 1067 корхонаю ташкилоти хусусӣ фаъолият дорад, ки нисбат ба соли гузашта 100 корхона зиёд аст. Аз миқдори умумӣ  209 корхонаи саноатӣ, 125 корхонаи сохтмонӣ ва 431 коргоҳи соҳаи савдо мебошад, ки танҳо ҳаҷми умумии маҳсулоти истеҳсолнамудаи коргоҳҳои саноатӣ дар соли сипаригашта зиёда аз 490 миллион сомониро ташкил додааст. 
Дар вохӯрӣ Р.Аҳмадзода ба 20 нафар соҳибкори муваффаки шаҳр барои саҳми арзанда дар рушди соҳибкорӣ туҳфаҳои хотиравӣ супорид. 
Дар навбати худ соҳибкорон барои ҳамкорӣ ва дастгирии ҳамаҷониба баҳри пешбурди фаъолияти худ ба роҳбарияти шаҳр изҳори сипос намуданд,- илова намуд манбаъ.