Конфронс: «Нақши Ҳисор дар тамаддуни Шарқ»

Душанбе, 28.01.2015. (АМИТ «Ховар», Мавҷуда Анварӣ). — «Нақши Ҳисор дар тамаддуни Шарқ»- таҳти чунин унвон конфронси байналмилалии илмиву назариявӣ дирӯз дар Донишгоҳи миллии Тоҷикистон доир гардид. 
Ин ҳамоиш ба сеҳазорсолагии Ҳисори Шодмон, ки соли равон таҷлил мегардад, бахшида шуд. Дар он олимону донишмандон ва таърихшиносони тоҷику хориҷӣ дар мавзӯоти гуногун оид ба сарчашмаҳо, омӯзишу таҳқиқот ва натиҷаи ҷустуҷӯҳои тӯлонӣ дар ҳудуди Ҳисор маърӯзаҳои пурмуҳтаво карданд. 
Тавре ки маълум аст, моҳи сентябри соли 2015 дар кишвар сеҳазорсолагии яке аз минтақаҳои бостонии Тоҷикистон — ноҳияи Ҳисор таҷлил мегардад. Корҳои ободонӣ ва таҳқиқоту омӯзишӣ дар ин мавзеи таърихӣ дар ҳоли идомаёбианд. Тавре ки дар конфронс баён гардид, Ҳисор ҳамчун мавзеи таърихӣ ва яке аз марказҳои тамаддуни миллати тоҷик дар ҳама давру замон аз ҷониби бостоншиносон мавриди таҳқиқу омӯзиш қарор дошт. Имрӯз низ аз ҷониби таърихчиён ва бостоншиносон дар ин самт корҳои зиёди таҳқиқотӣ гузаронида мешаванд. Гарчанде таърихи Қалъа аз асрҳои 15-16 сарчашма мегирад, аммо то бунёди он ҳаёт дар ҳудуди он ҳамчун як давлати бузург 50 ҳазор сол қабл идома доштааст ва мардуми зиёде умр ба сар мебурдаанд. Дар доираи омодагиҳо ба ин ҷашн дар ноҳияи Ҳисор бештар аз 200 иншооти таъйиноти гуногун бунёд ёфта, маркази он ба як шаҳри ободу зебои замонавӣ табдил хоҳад ёфт.