Маросими туҳфасупорӣ ба Академияи ВКД дар вилояти Суғд

Душанбе, 08.01.2015 (АМИТ «Ховар», Лайло Тоирӣ).-Дар доираи сафари корӣ ба вилояти Суғд вазири корҳои дохилӣ, генерал-лейтенанти милитсия Раҳимзода Рамазон Ҳамро барои боз ҳам беҳтар ба роҳ мондани таълиму тарбия ба Академияи Вазорати корҳои дохилии Ҷумҳурии Тоҷикистон дар вилояти Суғд 3 дона компютер, 3 дона принтер, 2 дона ҷомадони криминалистӣ, 2 дона таҷҳизоти гармидиҳанда,  2  дона кондитсионер, 1 дона телевизор, 1 мошини боркаши тамғаи «Хундай-Портер», китобҳои дарсии «Фаъолияти оперативӣ-ҷустуҷӯӣ»-и вазири корҳои дохилӣ Раҳимзода Рамазон Ҳамро ва ба маблағи 10 ҳазор сомонӣ китобҳои дарсии гуногун тақдим намуд.
Бино ба иттилои хадамоти матбуоти ВКД, ҳамчунин, бо Фармони вазири корҳои дохилии Ҷумҳурии Тоҷикистон Раҳимзода Рамазон Ҳамро 50 нафар муаллими Академияи ВКД дар вилояти Суғд бо маблағи 300 сомонӣ ҳавасманд гардонида шуд.
Аз ин дастгирию ғамхориҳои роҳбарияти Вазорати корҳои дохилӣ ҳайати шахсӣ ва курсантону шунавандагони Академияи мазкур рӯҳбаланд гардида, изҳори миннатдорӣ намуданд.