Муъминобод: суратҳисоби махсус барои ятимони кулл

Муъминобод, 30.01.2015. (АМИТ «Ховар», Сулаймони Хол)-Дар ноҳияи Муъминобод зимни нишасти матбуотӣ раиси ноҳия Тоҳирхон Амиршоев  оид ба вазъи иқтисодӣ ва иҷтимоӣ гуфт, ки  нақшаи қисми  даромади буҷет  дар ноҳия  бо назардошти  ёрии молиявӣ  ва тағйироту  иловаҳо 100% таъмин шуд.  Дар ин давра  соҳаҳои буҷетӣ  ба маблағи 31 млн 526 ҳазору 178 сомонӣ  маблағгузорӣ шуданд, ки  нисбат ба ҳамин давраи соли гузашта  3 млн 874 ҳазору 287 сомонӣ  зиёд аст.  Инчунин ба маблағи 21 млн 872 ҳазору 600 сомонӣ  музди меҳнат дода шуд, ки 69,3 фоизи  хароҷотро  ташкил намуда,  нисбат ба ҳамин давраи соли гузашта  3 млн 399 ҳазору 445 сомонӣ  зиёд аст. Қарздории музди меҳнат  ва нафақа мавҷуд набуда,  кормандони соҳаҳои буҷетӣ  дар муҳлатҳои муайяншуда  бо музди меҳнат таъмин шуданд. Ҳамзамон аз фонди  раиси ноҳия  ба оилаҳои камбизоат  28 ҳазору 500 сомонӣ  дода шуда, барои 38 нафар  ятими кулл  аз ҳисоби  ташкилоту  муассисаҳо  ва хоҷагиҳо  42 ҳазору 707 сомонӣ ҷудо гардида, он дар суратҳисоби  махсуси  кушодаи филиали БДА «Амонатбонк»  дохил шуд, ки  ба сари ҳар ятими кулл 1124  сомонӣ рост меояд.