Мушкилоти соҳибкорӣ дар Тоҷикистон: тадқиқоти МТС

Душанбе,05.01.2015 (АМИТ «Ховар», Фарзонаи Давлат).- Маркази тадқиқоти стратегии назди Ҳукумати Тоҷикистон натиҷаи тадқиқоти сотсиологии мушкилоти соҳибкорӣ дар Тоҷикистонро пешниҳод намудааст, ки бо ин тадқиқот 32 шаҳру ноҳияи ҷумҳурӣ фаро гирифта шудааст.
Тавре ки дар ин бора Худобердӣ Холиқназарзода, раиси Маркази таҳқиқоти стратегии назди Ҳукумати  Тоҷикистон дар ҷамъбасти солонаи марказ иттилоъ дода гуфт: таваҷҷуҳи онҳо ба масъалаҳои рушди соҳибкорӣ бо назардошти қабули Кодекси нави андоз ва узвияти кишвар дар Созмони ҷаҳонии савдо дода шудааст.
Иттилоъ дода шуд, ки аз декабри соли 2014 марказ тадқиқоти сотсиологии масъалаҳои мутобиқати таҳсилоти касбӣ бо бозори меҳнатро оғоз намудааст, ки он бо дастгирии Ташкилоти байналмилалии меҳнат гузаронида мешавад.
Гуфта мешавад, ки ҳадафи асосӣ бо баҳогузории талаботи  бозори меҳнат ба мутахассисон, неруи муассисаҳои таҳсилоти касбию техникии ҷумҳурӣ, махсусан бо назардошти хусусияту нақшаҳои рушди соҳаҳои кишоварзӣ, энергетика ва нақлиёт алоқаманд аст. Натиҷаи ин тадқиқот дар марти соли равон пешниҳод хоҳад гашт.