Соли 2013 “Шрек” ва “Мадагаскар”-и тоҷикӣ — соли 2015 чӣ навгонӣ?

Душанбе, 28.01.2015 (АМИТ «Ховар», Лайло Тоирӣ).- Бо мақсади назорат намояндагони Кумитаи забон ва истилоҳоти назди Ҳукумати ҶТ соли 2014 дар 16 ҷаласаи Шӯрои бадеии Корхонаи воҳиди давлатии “Тоҷиккино” ширкат намуда,  беш аз 112 филми аз забонҳои туркӣ, арабӣ, англисӣ ва ҳиндӣ ба забони тоҷикӣ тарҷумашударо, ки аз ҷониби студияҳои “Нурангез”, “Арш”, “Симо Продакшн”, “Килк”, “Ҳамсадо”, “Тоҷикфилм” ва “Асар” пешниҳод шудаанд, мавриди баррасӣ қарор доданд. Дар ин бора имрӯз, 28 январ зимни нишасти матбуотӣ раиси Кумитаи забон ва истилоҳот Гавҳар Шарофзода иттилоъ дод.
Ба гуфтаи номбурда ҳангоми баррасӣ оид ба истифодаи калимаю ибораҳо, ифода ва риояи меъёри забони адабӣ эроду пешниҳодҳои мушаххас манзур  шуданд. 
Дар мавриди тарҷумаи ғалат ва лаҳни қабеҳи филмҳои тасвирӣ Гавҳар Шарофзода баён дошт, ки соли 2014 дар шаҳри Кӯлоб филмҳои тасфирии лаҳни қабеҳ дошта ва бе хулоса ва мувофиқаи кумита ба фурӯш бароварда шуда, аз мағозаю дӯконҳо бароварда шуданд.  Дар нимсолаи аввали соли 2015 бо иштироки гурӯҳи корӣ дар якҷоягӣ бо   Прокуратураи генералӣ ва Вазорати фарҳанг дар пойтахт низ гузаронидани чунин чорабинӣ дар назар  аст. 
Ба гуфтаи сармутахассиси шуъбаи танзими истилоҳот Раҳим Раҷабзода филмҳои тасвирӣ ва бадеӣ аз ҷониби шахсони инфиродӣ таҳия мегардиданд ва то соли 2013 дар ҳисоботи кумита ва гурӯҳҳои санҷишии кумита ин масъала мавриди баррасӣ қарор гирифта буд. “Бояд ёдовар шавам, ки филмҳои тасвирии “Мадагаскар” ва “Шрек”  аз дӯконҳои фитафурӯшӣ бардошта шуда ва ба “Тоҷиккино”, ки масъуланд,  супоришҳои мушаххас дода шуд.  Соли 2014 тибқи нақша кумита дигар корҳоро ба сомон расонида, соли 2015 ҳатман ин масъаларо боз баррасӣ хоҳанд кард”,- гуфт Р.Раҷабзода.