Суд: пардохти зиёда аз 1 млн. сомонӣ ба буҷети давлат

 
Душанбе, 14.01.2015. (АМИТ «Ховар», Муқаддас Темурзода).- «Дар давраи ҳисоботӣ дар Суди олии  иқтисодии Ҷумҳурии Тоҷикистон 435 адад парванда ва 172 аризаву шикоят баррасӣ шудааст, ки ҷамъи умумии он 607 ададро ташкил медиҳад»,- изҳор дошт раиси Суди олии иқтисодӣ Мансурзода Наим имрӯз зимни нишасти матбуотӣ ба хабарнигорон. 
Вай ҳамчунин зикр намуд, ки  маблағи даъвоҳои қонеъ гардида 30 млн. 696 ҳазору 381 сомониро ташкил медиҳад. Аз маблағи даъвоҳои қонеъшуда ба манфиати  мақомоти давлатӣ  12 млн. 531 ҳазору 410 сомонӣ рӯёнида шуда, аз рӯйи аризаҳои даъвогӣ, шикоятҳои кассатсионӣ ва назорати боҷи давлатӣ ба фоидаи буҷети давлат ба маблағи 1 млн. 052 ҳазору 602 сомонӣ пардохт шудааст.  
Дар ҷараёни нишасти матбуотӣ  дар чавоб ба саволи хабарнигори АМИТ «Ховар» оид ба парвандаҳои ширкатҳои хориҷӣ Мансурзода Наим гуфт, ки дар давоми сол 4 даъвои баҳсии ин гуна ширкатхо ба қайд гирифта шудааст.