Татбиқи лоиҳаи нави Иттиҳоди Аврупо

Душанбе, 26.01.2015. (АМИТ «Ховар», Раъно Нусратуллозода).-Чанде пеш ба муносибати оғози Лоиҳаи Иттиҳоди Аврупо «LOT:1 Дастгирии самтҳои алоҳидаи ислоҳоти идораи молияи давлатии Europe Aid /134384/DH/SER/TJ» мушовирони лоиҳа ва намояндагони консорсиуми LouisBerger дар Донишкадаи молия ва иқтисоди Тоҷикистон (ДМИТ) бо роҳбарияти донишкада вохӯрданд.
Тавре ки сухангӯи донишкада Машҳура Абдуллоева иттилоъ дод, гурӯҳи корӣ аз синфхонаҳо, маркази тестӣ, толорҳои лексиониву варзишии таҷдидшуда ва ҳуҷраҳои кории худ дидан карда, ба сифат ва тарҳи онҳо баҳои баланд доданд. Ёдовар мешавем, ки лоиҳаи нави Иттиҳоди Аврупо барои дастгирии татбиқи ислоҳоти низоми идораи молияи давлатӣ аз тарафи Ҳукумати Ҷумҳурии Тоҷикистон ба нақша гирифта шудааст. Ба лоиҳа гурӯҳи коршиносони варзидаи байналмилалӣ аз ИМА, Аврупо ва ИДМ дар соҳаи макроиқтисод, ояндабинӣ ва сиёсати андозу буҷетӣ, ғайримарказонидани фискалӣ, ҳамчунин таҳкими муассисаи таълимӣ ҷалб  шудаанд.
Лоиҳа дар муддати се сол татбиқ мегардад ва дар ин муддат коршиносони лоиҳа дар ДМИТ ва Вазорати молияи Ҷумҳурии Тоҷикистон дар якҷоягӣ бо ҳамкорони тоҷики худ баҳри дастгирии ислоҳоти татбиқи молияи давлатӣ ва рушди минбаъдаи Донишкадаи молия ва иқтисоди Тоҷикистон фаъолият мебаранд.