ТВС забони хориҷӣ меомӯзонад

Душанбе, 07.01.2015. (АМИТ «Ховар», Мукаддас Темурзода).- Дар нишасти матбуотие, ки имрӯз дар Муассисаи давлатии «Телевизиони Сафина» баргузор гардид, директори муассиса Лутфулло Давлатзода изҳор дошт, ки бо мақсади тарғибу ташвиқи фарҳанги миллӣ ва мусоидат ба ташаккули фарҳангу маънавиёт дар ҷомеа  ТВС дар ҳамкорӣ бо телевизиони «Тулуъ»-и Ҷумҳурии Исломии Афғонистон лоиҳаи «JILO»- маросими байналмилалии ҷоизасупорӣ барои саҳмгузорӣ дар рушди фарҳанг ва санъати форсизабонони дунёро амалӣ намуд. Даври ҷамъбастии лоиҳа дар Муассисаи Душанбе — Плаза дар сатҳи баланди ташкилӣ бо иштироки шахсиятҳои маъруфи фарҳангу ҳунар ва ҳунармандони машҳур баргузор шуд ва аз ҷониби бинандагон баҳои баланд гирифт.
«Дар семоҳаи охир бо назардошти талаби замон таҳия ва пахши барномаи омӯзиши забони англисиро ба роҳ мондем, ки ҳафтае се маротиба пахш мешавад. Ин барнома аллакай мухлисони худро пайдо кардааст ва боварӣ дорем, ки бо таҳия ва пахши ин барнома дар забонмӯзии насли наврас ва дар маҷмӯъ, бинандаҳои «Телевизиони Сафина» саҳмгузор бошем»,-  афзуд Л. Давлатзода.