Қирғизистон: “Муқовимат бо нашъамандӣ ва ВНМО”

Душанбе, 23.02.2015. (АМИТ «Ховар», Мавҷуда Анварӣ). -Дар Донишгоҳи технологии шаҳри Ӯши Қирғизистон вохӯрии кормандони Хадамоти давлатии назорати маводи нашъаовари назди Президенти Ҷумҳурии Қирғизистон (ХДНМН) бо ҳайати устодон ва донишҷӯёни мактаби олӣ дар мавзӯи “Муқовимат бо нашъамандӣ ва ВНМО” хафтаи гузашта баргузор гардид. 
Дар вохӯрӣ намояндагони Агентии назорати маводи нашъаовари назди Президенти ҶТ, Хадамоти Федералии Федератсияи Русия оид ба назорати муомилоти маводи нашъаовар иштирок намуданд.
Дар вохӯрӣ муовини раиси ХДНМН назди Ҳукумати Ҷумҳурии Қирғизистон Г.С. Анорбоев дар бораи вазъи маводи нашъаовар ва чорабиниҳои мухталифи пешгирикунанда сухан гуфт.
Намояндаи АНМН назди Президенти Ҷумҳурии Тоҷикистон С. Олимов ба донишҷӯён дар бораи ташаббусҳои зиддимухаддиротии Ҳукумати ҶТ ва чорабиниҳои байналмилалии зиддимухаддиротие, ки дар солҳои 2013-2014 бо ҷалби сокинони ноҳияҳои наздисарҳадии Қирғизистон гузаронида шуданд, иттилоъ дод.
Бояд зикр намуд, ки бо мақсади ташкили самараноки муқовимат бо қочоқи маводи нашъаовар ва ҳамоҳангсозии амалҳои муштарак дар Қирғизистон намояндаи АНМН назди Президенти Ҷумҳурии Тоҷикистон дар шаҳри Ӯш амал менамояд.