Хонандаи беҳтарини Чкалов муайян шуд

Душанбе, 28.02.2015 (АМИТ “Ховар”, Рафоати Абдулҳамид).- Бо мақсади дарёфти хонандаи фаъолу боистеъдод  дар мактабҳои таҳсилоти умумии шаҳри Чкалов озмуни «Хонандаи беҳтарин» гузаронида  шуд.
Тавре ки Хадамоти матбуоти раиси вилояти Суғд хабар додааст, дар даври шаҳрии озмун 7 нафар хонандаи беҳтарин аз  ҳамаи таълимгоҳҳо, ки дар даври мактабии озмун  ғолиб омада буданд,  аз рӯи шартҳои   кор бо компютер, ҷавоб ба саволҳои ғайримунтазира,  намоиши дониш аз фанҳои дақиқ,  қироати порчаҳои насрӣ  доир ба  Ватан, модар, забон ва  шуғли дӯстдошта ширкат варзиданд.
Дар ҷамъбаст хонандаи синфи 9- и гимназияи № 2 Нигина Аҳруллоева сазовори ҷойи якум, хонандаи синфи 10- и литсейи № 1 Муяссара Ҷалолова ҷойи дуюм ва  хонандаи  синфи 9- и гимназияи № 1 Искандар Абдураҳимов сазовори ҷойи сеюм дониста шуд.
Ба ғолибони озмун  китобҳо ва туҳфаҳои шуъбаи маориф супорида шуданд.