Таҷҳизоти нав барои Сарраёсати геология

Душанбе,  03.02.2015. (АМИТ «Ховар»,  Кристина  Эрлих).- Ҳафтаи  гузашта   дар  ҷараёни  мулоқоти   геологҳои  Тоҷикистону  Финляндия  масоили  харидории  таҷҳизоти  геофизикии  «МЕРИ -24»  барои анҷом додани  корҳои  муҳандисию  геофизикӣ ва дастгоҳи  «АСТРА — 100» мавриди  муҳокима  қарор  гирифтанд. 
Тавре  ки  аз хадамоти  матбуоти Сарраёсати  геологияи  назди  Ҳукумати  ҶТ  хабар  доданд, ҷонибҳо иброз  доштанд, ки   бояд  вазъи  обҳои  зеризаминӣ таҳқиқ  намуда, феҳрасти чоҳу  корезҳо тартиб дода шавад. 
Зимни  мулоқот  масъалаи  анҷом додани  тадқиқоти  сеҷонибаи  геофизикии  миёни  геофизикҳои  Афғонистон,  хадамоти  геологии  Финляндия  ва  Тоҷикистон  мутобиқи   шартномае, ки  моҳи  декабри  соли  2014  дар  шаҳри  Истамбули  Туркия   имзо шуда буд,  баррасӣ  шуданд.
Намояндаи  хадамоти геологии  Финляндия  Юкка Мултала зикр  намуд, ки   дар  Ҷумҳурии  Тоҷикистон  барои  омӯхтани   барномаҳои  компютерии  GIS ва ARGIS   барои таҳияи  харитаҳои электронӣ  курсҳои  кӯтоҳмуддат  ташкил  карда  мешаванд.  Мавсуф  изҳор  дошт, ки  ташкили  курсҳои  кӯтоҳмуддат  барои  омӯхтани  забони  англисӣ  низ  дар  назар  аст.