Тамрини «Рушди қувваҳои сулҳҷӯёнаи СММ» дар Душанбе

Душанбе, 12.02.2015 (АМИТ “Ховар”, Фарзонаи Давлат).-Шуъбаи ҳамкории ҳарбии Сафорати ИМА ва Маркази омӯзиши масоили амният ба номи Ҷорҷ Маршалл давраи омӯзиши солонаи сеюми “Рушди қувваҳои сулҳҷӯёнаи СММ”-ро аз 9 то 11 феврали соли ҷорӣ дар шаҳри Душанбе гузаронданд. 
Дар давраи омӯзишӣ соли равон мутахассисони соҳаи амалиёти сулҳҷӯена аз ИМА, Олмон, Муғулистон ва Қазоқистон масъалаҳои стратегии сатҳи миллиро оид ба рушд, омӯзиш ва ҷойгиршавии қувваҳои мусаллаҳи Тоҷикистон дар ҳайати қувваҳои сулҳҷӯёнаи СММ матраҳ намуданд. Намояндагони Қазоқистон ва Муғулистон таҷрибаи худро дар такмили фаъолияти сулҳҷӯёна, ҷанбаи қонунгузорӣ ва таҷрибаи иштироки амалӣ дар амалиёти сулҳҷӯёнаи СММ ва амалиёти коалитсионӣ ҷиҳати собитгардонӣ муҳокима карданд.
Ба иттилои сафорати ИМА дар Тоҷикистон, Иёлоти Муттаҳидаи Амрико дар доираи барномаи «Ташаббуси ҷаҳонии амалиёти сулҳҷӯёна» (GPOI) аз соли 2007 ба Вазорати мудофиаи Ҷумҳурии Тоҷикистон ҷиҳати таҳкими иқтидори сулҳҷӯёна кумак мерасонад. Дар чорчӯбаи барномаи мазкур гуфта мешавад, ки Тоҷикистон соли 2010 баталйони сулҳҷӯёнаро таъсис дода, бо ёрии Амрико ҷузъҳои баталйони сулҳҷӯёна аз соли 2012 дар як зумра машқҳои омӯзишии сулҳҷӯёна дар Муғулистон, Непал, Қазоқистон, Олмон ва ИМА иштирок карданд. Шарокати пойдори ИМА ва Тоҷикистон дар доираи GPOI ба 6,6 миллиони доллари ИМА баробар буда, ба гузарондани омӯзишу машқҳо, таъмини таҷҳизот, тармими истиқоматгоҳ ва такмили шароитҳои омӯзишу тайёрӣ равона шудааст.
Шуъбаи ҳамкории ҳарбии Сафорати ИМА дар ҳамкорӣ бо қувваҳои мусаллаҳ ва мақомоти амнияти Тоҷикистон давраҳои омӯзишии мухталиф, таъмини таҷҳизот ва дигар фаъолияти шарикӣ, аз ҷумла дар арсаи мубориза зидди терроризм, гардиши ғайриқонунии маводи мухаддир, амнияти сарҳад, фаъолияти сулҳҷӯёнаи СММ, кумаки башардӯстона, безарарсозии минаҳоро татбиқ карда, ҳар сол тахминан 80 чорабиниро дар Тоҷикистон ва ИМА мегузаронад.