Вусъати корҳои ободонӣ дар Кӯлоб

 Кӯлоб, 14.02.2015. (АМИТ «Ховар», Сулаймони Хол).-Бахшида ба ҷашнҳои  таърихии 700-солагии алломаи  Машриқзамин  Мир Сайид Алии Ҳамадонӣ, 70-солагии Донишгоҳи давлатии Кӯлоб ва пойтахти фарҳангӣ эълон гардидани  шаҳри Кӯлоб  дар ин минтақа 700  рӯзи ободонию сабзазоркунӣ эълон гардида, дар ин замина  корҳои ободонию созандагӣ  бо маром  ҷараён доранд. 
Ба қавли сардори шуъбаи  ҳифзи муҳити зисти шаҳри Кӯлоб  Хуршед Ашӯрмадов  шуъбаи ҳифзи муҳити зист  дар мавсими ниҳолшинонӣ 68 ҳазор  бех ниҳоли  ҳамешасабзу  ороиширо  дар кӯчаю хиёбонҳои марказии шаҳр  шинониданд. 
Ба гуфти масъулин то ба имрӯз  бо ҷалби идораю ташкилот, муассисаю корхонаҳо  ва сокинон  дар қитъаҳои  вобасташуда   21 ҳазору 647 бех  ниҳоли  ҳамешасабзу ороишӣ ва зиёда аз 4 ҳазор  бех гулу буттаҳои мавсимӣ   шинонидаанд. 
Аз рӯи иттилои  масъулин  рӯзҳои истироҳатӣ  дар шаҳру  деҳоти Кӯлоб  ҳашари умумишаҳрӣ  эълон гардид.