Ҷоизаи тиллоии байналмилалӣ ба МД «Ҷаҳоннамо»

Душанбе, 27.03.2015. (АМИТ «Ховар», Мавҷуда Анварӣ).- Муассисаи давлатии «Ҷаҳоннамо» барои нишондод ва дастовардҳо дар соҳаи идоракунӣ, баланд бардоштани сифати кору маҳсулот ва ҷорӣ намудани технология ва инноватсияҳои ҷадид ба дарёфти ҷоизаи тиллоии байналмилалии «Тоҷ барои сифат» сазовор гардид. Ҷоиза аз ҷониби Ширкати байналхалқии Би-Ай-Ди-Бизнес Инишиатив Дайрекшинз (Business Initiative Directions) созмон дода шудааст. Бояд гуфт, бори аввал дар таърих як телевизиони кишвар ба дарёфти чунин ҷоиза ноил гардид, ки ифтихори тамоми тоҷикистониён аст. Маросими супоридани ҷоиза шоми 22-юми марти соли 2015 дар толори конвенсияҳои Меҳмонхонаи Интер-Континентали шаҳри Женеваи Швейтсария бо иштироки намояндагони тақрибан 80 давлати ҷаҳон ва беш аз 200 ширкату муассиса аз тамоми нуқоти олам доир гардид. Дар вазъияти тантанавӣ раиси ширкати Business Initiative Directions Хоссе Прието ба директори МД «Ҷаҳоннамо» — Ҳакимзода Абдумаҷид Усмон мукофотро супорида, таъкид кард, ки «Ҷаҳоннамо» намунаи беҳтарини ташаббусҳо дар роҳи такмили сарварӣ, ҷорӣ кардани технологияҳои нав ва инноватсияҳо буда, муассисаҳои ба он монанд метавонанд аз он ибрат гиранд. Дар зимн Донишкадаи молия ва иқтисоди Точикистон низ ба дарёфти ҷоизаи тиллоии байналмилалии «Тоҷ барои сифат» мушарраф гардид, ки он дар маросими мутантан ба ректори донишкада — Ашӯрбой Солиев супорида шуд.
Ёдрас мешавем, ки ширкати Business Initiative Directions соли 1986 ташкил гардида, қароргоҳи асосии он дар Испания воқеъ аст. Фаъолияти ширкат асосан ба дастгирии ташкилоту корхонаҳо дар соҳаи сифат, сарварӣ ва технологияву инноватсия равона шудааст. Ҳадафи асосии он баланд бардоштани сифат дар идораи истеҳсолот буда, то имрӯз намояндагони 178 кишвари дунё ба дарёфти ҷоизаҳои ширкати мазкур сазовор гардидаанд.