Бақияи қарзҳо 29,1 фоиз зиёд шуд

Душанбе, 05.03.2015. АМИТ «Ховар», Лайло Тоирӣ).-Тибқи маълумоти омор бақияи умумии қарзҳо дар ташкилотҳои қарзии ҷумҳурӣ дар нахустин моҳи соли ҷорӣ 9 млрд 903,8 млн. сомониро ташкил намуда, дар қиёс ба ҳамин давраи соли гузашта 29,1 фоиз афзуд. 
Бино ба иттилои дафтари матбуоти БМТ, аз ин маблағ 3 млрд 961,5 млн. сомонӣ қарзҳо ба пули миллӣ ва 5 млрд 942,3 млн. сомонӣ ба асъори хориҷӣ рост меоянд. Дар моҳи январ низ раванди афзоиши қарзҳои дарозмуҳлат идома ёфта, он ба 4 млрд 766,5 млн. сомонӣ баробар шуд. 
    Фоизи миёнавазни қарзҳо дар низоми бонкии кишвар дар моҳи январ бо пули миллӣ 26,52 фоиз ва бо асъори хориҷӣ 23,67 фоизи солонаро ташкил намуд. 
    Ҳамчунин дар аввалин моҳи соли равон ҳаҷми қарзҳои хурди додашуда низ дар муқоиса ба ҳамин давраи соли қаблӣ 6,7 фоиз зиёд шуд. Аз ҷумла 88,5 млн. сомонӣ ба ноҳияҳои дурдасти кӯҳистон қарзҳои хурд дода шудаанд, ки назар ба ҳамин давраи соли гузашта 0,2 фоиз зиёд мебошад.