Бохтар: бунёди 30 корхонаи нави саноатӣ

Душанбе, 23.03.2015. (АМИТ «Ховар», Мавҷуда Анварӣ). — Соли ҷорӣ дар ноҳияи Бохтар 30 корхонаю коргоҳи нави саноатию истеҳсолӣ бунёд ва мавриди баҳрабардорӣ қарор хоҳад гирифт.
Ҷаббори Ғаффор, раиси ноҳияи Бохтар ба хабарнигори АМИТ «Ховар» иброз намуд, ки соли гузашта низ 9 корхонаи саноатӣ ва 21 коргоҳи хурди истеҳсолию иншооти хизматӣ ва маишӣ дар ноҳия сохта шуд. 
«Соли гузашта ҳаҷми маҳсулоти истеҳсолшуда дар коргоҳу корхонаҳои ноҳияи Бохтар зиёда аз як миллиард сомониро ташкил дод, ки нисбат ба соли 2013 ба қадри 35 миллион сомонӣ бештар аст», — афзуд Ҷ. Ғаффор.
Раиси ноҳияи Бохтар инчунин аз ҳамкории зичи соҳибкорони маҳаллӣ бо мақомоти иҷроияи ҳокимияти давлатӣ истиқбол кард. Ба қавли ӯ мумфарш шудани 4 километр роҳ ва сангфарш шудани 8,3 километр роҳ аз ҷониби соҳибкорону хоҷагиҳои деҳқонии ноҳия намунаи хуби иштироки доираҳои тиҷоратӣ дар умури ободонию созандагист.