Э. Раҳмон: «80 фоизи кормандони «Амонатбонк» аз ҳисоби занону духтарон ба кор ҷалб шаванд»

Душанбе, 13.03.2015. (АМИТ «Ховар», Мавҷуда Анварӣ).- Имрӯз дар пойтахти кишвар аз ҷониби Президенти кишвар Эмомалӣ Раҳмон бо гузоштани санги асос ва нома ба наслҳои оянда ба сохтмони бинои нави раёсати Бонки давлатии амонатгузории Ҷумҳурии Тоҷикистон «Амонатбонк» оғоз бахшида шуд.
Чунонки иттилоъ доданд, ин бино аз даҳ ошёна иборат буда, дар зарфи се сол бо харҷи беш аз 97 млн. ҳазор сомонӣ бо маблағгузории Бонки давлатии рушди чинӣ ва маблағҳои худии «Амонатбонк» бунёд хоҳад ёфт.   
Бинои нав аз 180 утоқи корӣ, 20 утоқи машваратӣ, конференсзал барои 100 нафар, маҷлисгоҳ бо 180 ҷойи нишаст, ошхона бо 200 ҷойи нишаст ва тавақкуфгоҳи зеризаминии 2-ошёна иборат хоҳад буд. Дар маҷмӯъ бинои нав барои фаъолияти 750 нафар корманд бо шароити мусоиди корӣ пешбинӣ шудааст. Баландии ошёнаҳо 4,2 м мебошад.
 Масоҳати қитъаи замини ҷудошуда 4200.00 метри мураббаъ буда, масоҳати зерсохтмони бино 1978,83 метри мураббаъро ташкил медиҳад.
Лоиҳаи мазкур аз ҷониби ҶСК «Пажӯҳишгоҳи илмӣ ва лоиҳакашию ҷустуҷӯии САНИИОСП» таҳия шуда, пудратчӣ ҶДММ «Роҳат-сохтмон» мебошад.
Дар вақти сохтмон дар ин ҷо зиёда аз 200 нафар бинокори маҳаллӣ бо кор таъмин мешавад.
Президенти кишвар Эмомалӣ Раҳмон ба роҳбарияти «Амонатбонк» дастур дод, ки беш аз 80 фоизи кормандон аз ҳисоби занону духтарони соҳибтахассуси соҳа ба кор ҷалб шаванд.