Хатлон: 271 осебдида аз сагҳои дайду

Душанбе, 3.03.2015. (АМИТ «Ховар», Мавҷуда Анварӣ).-Шумораи афроди осебдида аз ҳамлаи ҳайвонот дар вилояти Хатлон рӯ ба афзоиш ниҳодааст.
Ба иттилои Раёсати тандурустии вилоят, танҳо дар моҳи январи соли ҷорӣ 271 сокини шаҳру навоҳии вилоят аз ҳуҷуми сагҳои дайду осеб дидааст. «Бахусус дар рӯзҳои сарди зимистон дар ноҳияҳои баландкӯҳ, ҳатто дар ҳамвориҳо сагҳои дайду зиёд шуда, хатари ҳамлаи онон ба одамон меафзояд. Бинобар ин, назорати хадамоти байторӣ бояд пурзӯр шуда, мақомоти дахлдор барои безарарсозии сагҳои бесоҳиб талоши бештар ба харҷ диҳанд. Осебдидагон, дар навбати худ, бояд дар зудтарин фурсат ба табибон муроҷиат намоянд», — афзуд манбаъ дар Раёсати тандурустии вилоят.
Соли гузашта наздики 4 ҳазор нафар дар вилояти Хатлон бар асари ҳамлаи сагони дайду осеб дида, ба табибон муроҷиат кардааст.