Ифтитоҳи биноҳои нави «Амонатбонк» дар се ноҳия

Душанбе, 30.03.2015.(АМИТ  «Ховар», Лайло Тоирӣ).- Раёсати Бонки давлатии амонатгузории Ҷумҳурии Тоҷикистон «Амонатбонк» дар робита ба ҷашни байналмилалии Наврӯз дар ҷамоатҳои деҳоти Хистеварзи ноҳияи Б.Ғафурови вилояти Суғд, Тоҷикободи ноҳияи Вахши вилояти Хатлон ва Шогадоеви ноҳияи Тоҷикобод бо иштироки намояндагони Раёсати БДА ҶТ «Амонатбонк» ва мақомоти иҷроияи маҳаллии ҳокимияти давлатии ин ноҳияҳо биноҳои нави кории марказҳои хизматрасонии бонкиро ифтитоҳ кард. 
Сохтмони биноҳои нав дар асоси талаботи мавҷудаи ҳозиразамон ба анҷом расида, имконияти дастрасии аҳолиро ба хизматрасониҳои бонкӣ, аз ҷумла қабули ҳама гуна пардохтҳои буҷавӣ, пешниҳоди қарзҳои хурд, интиқоли маблағҳо, ҷалби маблағҳои озоди аҳолӣ ба пасандозҳо, ивази пулҳои фарсуда фароҳам меоварад. 
Дар айни ҳол сохтмони биноҳои нави кории марказҳои хизматрасонии бонкӣ дар ҷамоати Нулванди ноҳияи Дарвози ВМКБ, ҷамоати Зиракии шаҳри Кӯлоб, ҷамоати Сиёҳфарқи ноҳияи Ховалинг, ҷамоати ба номи Л.Қармишеви ноҳияи Темурмалик, ҷамоати Заргари ноҳияи Бохтари вилояти Хатлон, ҷамоати деҳоти Чилдараи ноҳияи Тавилдара, ҷамоати Эсанбойи ноҳияи Рӯдакӣ, ҷамоати Даҳанаи ноҳияи Ёвон ва ҷамоати ба номи И.Сомонии ноҳияи Ғончии вилояти Суғд давом дорад.
Дар ин бора ба АМИТ “Ховар” аз дафтари матбуоти “Амонатбонк” иттилоъ доданд.