Конфронс бахшида ба иди «Ғалаба» дар ДМТ

        Душанбе, 27.03.2015. (АМИТ «Ховар»,  Манижа Баҳромзода).- Дар  факултети  таърихи  ДМТ бахшида ба 70-умин  солгарди  ғалаба дар ҶБВ Конфронси ҷумҳуриявӣ таҳти унвони «Таърихнигории саҳми халқи  тоҷик дар торумори Германияи фашистӣ» баргузор гашт, ки дар он устодону муаррихон ва аспирантони Донишгоҳҳои кишвар роҷеъ ба ин масъала  ибрози назар намуданд. Сафармамад Сафармамадов-муовини ректори ДМТ оид ба илм ҳозиринро барои мутаваҷҷеҳ  шудан ба масъалаҳои норӯшани ҶБВ  ва  инъикоси он дар рисолаву корҳои таҳқиқотӣ даъват кард. «Ин ҷанг имкон дод, ки низоми мустамликадорӣ аз байн бурда шуда, инқилоби нави илмӣ-техникӣ дар ҷаҳон пайдо шавад»,-иброз дошт Мусаммир Иброҳимов, профессори факултети таърихи ДМТ дирӯз дар конфронси ҷумҳуриявӣ бахшида ба иди Ғалаба. Ба гуфтаи мавсуф заминаҳои асосии ҶБВ ба ақидаи олимон ҳанӯз солҳои пеш пайдо шудаанд, ки дар натиҷа ҷаҳон ба 2 қисм ҷудо шуда, роҳи нави тараққиётро пеш гирифт. 
        Амиршоҳ Ёрмуҳаммадов-дотсенти факултети таърихи ДМТ дар мавзӯи «Таърихнигории матбуоти тоҷик дар солҳои Ҷанги бузурги ватанӣ»  маърӯза намуда, зикр кард ки нақши  матбуоти замони ҶБВ  низ дар  баррасӣ ва инъикоси ин ҷанг хеле назаррас буда, ҳатто як қисми ходимони матбуот, ба монанди  Абдушукур Пирмуҳаммадзода, Дилмурод Элмуродов ва Аббос Иброҳим ба фронт рафта, қаҳрамонона ҳалок гаштанд: «Бисёр нависандаҳои мо дар ин давра қаламро бо яроқ иваз карданд, аз ҷумла Ҳабиб Юсуфӣ, Ҳаким Карим, Аминҷон Шукӯҳӣ ва Сотим Улуғзода дар фронтҳо корнамоӣ карданд»,-афзуд Амиршоҳ  Ёрмуҳаммадов.
         Дар муҳорибаҳои ҶБВ на танҳо аскарон ва шоирону нависандагон саҳм гузоштаанд, балки милитсияи тоҷик низ аз зумраи ин нафарон буд. Саидмуҳаммади Бобоҷон-аспиранти  факултети таърихи  ДМТ  дар робита ба ин гуфт, дар ин давра 1630 фиристодаи милитсия бар зидди фашизм мубориза бурд, ки 4 нафари онҳо қаҳрамони ҶБВ гашт. «Дар дохили Тоҷикистон сарҳадҳоро махсусан аз ҷониби Афғонистон нағз нигаҳбонӣ мекарданд, ки дар натиҷа зиёда аз 40 нафар иктишофчие, ки ба давлати Япония ва Англия тааллуқ доштанд, ошкор намуданд.»-мегӯяд  номбурда.
      Ёдовар мешавем, ки дар ҶБВ зиёда 200 000 шаҳрванди Тоҷикистон иштирок намуд, беш  аз  54  нафар  унвони  Қаҳрамони  Иттиҳоди Шӯравиро гирифтааст.