Модар- меҳвари меҳру муҳаббат

Душанбе, 10.03.2015. (АМИТ «Ховар», Раъно Нусратуллозода).-Дар  Осорхонаи маорифи Академияи таҳсилоти Тоҷикистон бахшида ба Рӯзи Модар бо ширкати кормандони Академияи таҳсилоти Тоҷикистон, Пажӯҳишгоҳи рушди маориф ва хонандагону омӯзгорони муассисаҳои таҳсилоти миёнаи умумии №65 ва 15-и шаҳри Душанбе дар мавзӯи «Модар- меҳвари меҳру муҳаббат» мизи мудаввар доир гардид.
Дар ҷамъомад президенти Академияи таҳсилоти Тоҷикистон Ғуломқодир Бобиев, директори Пажӯҳишгоҳи рушди маориф Шарифмуроди Исрофилниё ва муовини директори Донишкадаи ҷумҳуриявии такмили ихтисос ва бозомӯзии кормандони соҳаи маориф Абдулло Орипов зикр намуданд, ки таҷлил аз  Рӯзи Модар бо шарофати файзу баракати Истиқлол ва сиёсати хирадмандонаи  Президенти кишвар Эмомалӣ Раҳмон сол аз сол бо шукӯҳу шаҳомати хосса таҷлил мегардад ва мулоқоти Президенти кишвар бо намояндагони занону духтарони фаъол аз ҷумлаи чунин иқдомот маҳсуб ёфта, парастиш ва гиромӣ доштани модарону хоҳарон аз ҷумлаи анъанаҳои қадимаи мардуми соҳибтамаддуни тоҷик мебошад. 
Дар ҷамъомад дар мавзӯи «Агар зан намебуд, олам намебуд», «Зан – модар- чароғи хонадон» «Симои зан – модар дар эҷодиёти Мирзо Турсунзода» маърӯзаҳо шунида шуданд. Инчунин аз ҷониби хонандагони муассисаи таҳсилоти миёнаи умумии 65 ва 15-и шаҳри  Душанбе барномаи адабӣ пешкаши иштирокдорон гардид.