Панҷакент: иншоотҳои обрасонӣ омодаи коранд

Панҷакент, 16.03.2015.. (АМИТ «Ховар», Гулбаҳори Худойбердӣ).-  Тибқи дастури раиси вилояти Суғд Абдураҳмон Қодирӣ ва супориши иҷрокунандаи вазифаи раиси шаҳри Панҷакент Ислом Шафиев омода намудани иншоотҳои обрасонии ин диёр аз ибтидои моҳи феврал оғоз гардид. Дар тоза кардани 5 канали калони шаҳр аз техника ва қувваи зарурии корӣ босамар истифода мешавад. Бояд зикр намуд, ки баъди тоза карда шудан дар каналҳо миқдори зарурии ғунҷоиши об таъмин мегардад.
   Бори аввал дар тӯли солҳои зиёд ба канали Тӯқсанкорез хеле барвақт- 4 март ба тариқи озмоиш об сар дода шуд. Об ба мақсади шустани регу лойи канал равона шуд. 
   Сармуҳандиси Идораи беҳдошти давлатии замин ва обёрии шаҳри Панҷакент Имомиддин Саидмуродов дар суҳбат ба хабарнигори АМИТ «Ховар» иброз дошт, ки дар ҳамкорӣ бо Ассотсиатсияи  истифодабарандагони оби Панҷакент дар каналҳо дарвозаҳо ва обченкунакҳо шинонида мешаванд. Имрӯзҳо дар мавзеи ҷамоати деҳоти Сӯҷина ва Нуристони ҷамоати Чинор корҳои охирини тоза кардани канал бо суръат хотима меёбанд.
   Мавриди зикр аст, ки имсол кишоварзони минтақаҳо, ки аз канали Тӯқсанкорез обёрӣ мешаванд,  ба кишти зироатҳо ва обёрии он хеле барвақт оғоз менамоянд.