Фурӯзоншавии “Оташи абадӣ ” дар Хуҷанд

Хуҷанд, 22.04.2015. (АМИТ “Ховар”, Абдуаҳад Шарифзода).-Дар шаҳри Хуҷанди вилояти Суғд  мавзеи “Оташи абадӣ”, ки бозгӯ аз қаҳрамониҳои абармардон ва ёдгорӣ аз шаҳидони солҳои 1941-1945 аст, дубора аз тармим бароварда шуда, атрофи он бо гулҳои ҳамешасабзи баҳорӣ сарсабз гардонида шуда, он аз нав фурӯзон гашт.   
Тавре ки масъули хадамоти иттилоотии мақомоти шаҳр Маҳмудҷон Муҳаммадӣ хабар дод, вобаста ба дастури шаҳрдори Хуҷанд Раҷаббой Аҳмадзода вобаста ба пос доштани хотири қурбониёни Ҷанги Бузурги Ватанӣ ва бахшида ба таҷлили 70- солагии Иди Ғалаба бар фашизм мавзеи “Оташи абадӣ”, ки муҷассамаи мазкур соли 1975 бахшида ба 30- солагии ғалабаи мардуми шӯравӣ бар фашизм бунёд ёфта, тибқи лоиҳа яке аз қисматҳои ин ёдгорӣ оташи фурӯзон чун рамзи поси хотири ҷоннисорони ватан ба ҳисоб мерафт, аз нав барқарор шуда, он фурӯзон гашт. 
 
Мутобиқ ба иттилои масъулини Шӯрои собиқадорони ҷангу меҳнати вилояти Суғд, алъон дар шаҳри Хуҷанд 24 нафар ва дар умум дар миқёси вилояти Сугд  250 иштирокчии  набардҳои солҳои  1941-1945  иқомат доранд, ки ҳамарӯза аз дастгириву кумаки Сарвари давлат ва мақомоти вилоятиву шаҳрӣ бархурдоранд.