«Hyatt Regency Dushanbe», «Шом-7» ва «Меrvе»: беҳтаринҳои Душанбе

Душанбе, 14.04.2015.(АМИТ «Ховар», Марзия Саидзода).-«Hyatt Regency Dushanbe» зимни ҷамъбасти озмуни шаҳрдорӣ беҳтарин меҳмонхона дар пойтахти Тоҷикистон эътироф гардидааст. Инчунин дар асоси ҷамъбасти озмуни «Беҳтарин меҳмонхона, тарабхона ва ошхона дар соли 2014», «Шом-7» беҳтарин тарабхонаи Душанбе ва «Меrvе» беҳтарин ошхона дар ҳудуди пойтахт арзёбӣ гардиданд. Ҳадафи ин озмун ҳавасмандгардонӣ барои беҳтарин дастовардҳо ба меҳмонони хориҷӣ, сокинони Душанбе, рушди сатҳи хизматрасонӣ, ба талаботи меъёрҳои байналмилалӣ ҷавобгӯ гардондани меҳмонхонаю тарбхонаҳо, инчунин, рушди минбаъдаи соҳибкории хурду миёна дар пойтахт, таҳкими муносибатҳои судманд бо бахши хусусӣ ва муҳайё намудани шароити созгор барои ҷалби сармоягузорони ватанист. Бояд тазаккур дод, ки ғолибони озмуни «Беҳтарин меҳмонхона, тарабхона ва ошхона дар соли 2014» дар расми таҷлили Рӯзи пойтахт, ки соли равон ба 18 апрел иттифоқ меафтад, дар бинои «Душанбе Плаза» аз ҷониби раиси шаҳри Душанбе бо Ифтихорномаи шаҳрдорӣ ва Ҷоми фахрии «Ғолиб» сарфароз гардонида мешаванд.