Зарари офати табиӣ ба оилаи муҳоҷирон

Душанбе, 29.04.2015. (АМИТ  «Ховар», Лайло Тоирӣ).- 26  апрел дар ҷамоати Меҳнатободи ноҳияи Зафарободи вилояти Суғд дар натиҷаи боридани борони сел ва вазидани шамоли сахт ба хоҷагии халқ зиён расид. Дар минтақаи офати табиӣ ба муҳоҷирони дохилӣ (ихтиёрӣ) ва экологӣ аз ноҳияҳои Айнӣ, Кӯҳистони Мастчоҳ ва Ғончӣ замин ҷудо гардидааст, ки  дар айни замон як қисмашон баъди сохтани манзил дар он ҷо зиндагӣ карда истодаанд. 
Бо мақсади хабар гирифтан аз аҳволи муҳоҷирон ва мусоидат ба ҳалли мушкилоти онҳо  рӯзи  27 апрел  гурӯҳи корӣ ба ин минтақа сафарбар гардид. Ба ҳайати гурӯҳ намояндагони Ситоди ҳолатҳои фавқулода ва мудофиаи гражданӣ, муовини сардори Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд Ҷ. Атаев ва мутахассиси пешбари бахши муҳоҷирати дохилӣ(ихтиёрӣ) ва экологии Раёсат Д. Муродов шомил буданд. 
Зимни вохӯрӣ бо муҳоҷирон маълум гардид, ки дар натиҷаи офати табиӣ талафоти ҷонӣ ба қайд гирифта нашудааст.
Лекин дар натиҷаи вазидани шамоли сахт манзили 4 оилаи муҳоҷири ноҳияи Ғончӣ, 6 оилаи муҳоҷири ноҳияи Айнӣ ва 10 оилаи муҳоҷири ноҳияи Кӯҳистони Мастчоҳ қисман зарар дидааст. Ба таври мушаххас аз болои баъзе бомҳо бомпӯшҳо канда шуда, аз девори баъзе манзилҳои нотамом хиштҳо ба замин афтидаанд. Ягон манзили истиқоматӣ барои зист корношоям нашудааст.
Раёсат дар доираи имкониятҳои худ барои барқарор намудани зарар тадбирҳои амалӣ хоҳад андешид.