Мусобиқа оид ба таэквондо бахшида ба 70-солагии Ғалаба

Душанбе, 6.05.2015. (АМИТ “Ховар”, Ситораи Боймурод).- Тибқи иттилои дафтари матбуоти Кумитаи миллии олимпии кишвар имрӯз, 6-уми май дар Корти тенниси КВД «Роҳи оҳан”-и Тоҷикистон мусобиқаи кушодаи шаҳрӣ оид ба таэквондо (ВТФ) бахшида ба ҷашни 70-солагии Ғалаба дар Ҷанги Бузурги Ватании солҳои 1941-1945 баргузор мешавад. 
Ин мусобиқа бо ибтикори Кумитаи миллии олимпии Тоҷикистон дар ҳамкорӣ бо Федератсияи таэквондо (ВТФ)-и кишвар ва таҳти сарпарастии  ҶДММ «Ғаюр” барпо мегардад. 
Мусобиқаи мазкур тибқи қоидаҳои байналмилалӣ дар 8 вазн байни писарону духтарон ва мардон сурат мегирад. 
Гуфта мешавад, ки ғолибон ва онҳое, ки дар вазни худ ҷойҳои дувумро мегиранд, бо медалу туҳфаҳо ва сертификатҳои Кумитаи миллии олимпии Тоҷикистон сарфароз мешаванд. Ба варзишгароне, ки ҷойҳои севумро соҳиб мегарданд, медалу сертификат супурда хоҳад шуд.