418,5 ҳазор метри мураббаъ хонаи истиқоматӣ ба истифода дода шуд

Душанбе, 15.07.2015. (АМИТ «Ховар», Лайло Тоирӣ).- Дар шаш моҳи аввали соли равон ба масоҳати умумии 418,5 ҳазор метри мураббаъ хонаҳои истиқоматӣ ба истифода дода шуданд. Дар ин давра  фондҳои асосӣ ба маблағи 1 миллиарду 99,9 миллион сомонӣ ба кор андохта шуда, иҷрои корҳои сохтмонию васлгарӣ 1 миллиарду 762,9 миллион сомониро ташкил доданд. Дар ин бора имрӯз зимни нишасти матбуотӣ муовини аввали раиси Кумитаи меъморӣ ва сохтмони назди  Ҳукумати Ҷумҳурии Тоҷикистон Саидзода Нуралӣ Ғиёс хабар дод. 
Ба гуфтаи Саидзода Нуралӣ Ғиёс моҳҳои  январ-июни соли  2015   сармояи  асосӣ аз ҳисоби  ҳамаи  манбаъҳои   сармоядиҳӣ ба  маблағи 4 миллиарду 38,1 миллион сомонӣ истифода шудааст. 
“Дар ин давра барои 2 ҳазору 288 талаба мактабҳои таҳсилоти умумӣ, муассисаҳои томактабӣ бо 235 ҷой ва  дармонгоҳ барои қабули  96 бемор  дар як баст ба истифода дода шуданд”,- илова намуд мавсуф.