«Ҷавонон зидди терроризм ва ифротгароӣ»-иқдоми ҷавонони суғдӣ

Хуҷанд, 29.07.2015. (АМИТ «Ховар»).- 12-уми август дар саросари ҷаҳон Рӯзи байналмилалии ҷавонон таҷлил  мешавад. Ба ин муносибат тибқи дастури Кумитаи иҷроияи марказии ҲХДТ кумитаи иҷроияи вилоятии ҳизб тасмим гирифтааст, ки иқдоми «Ҷавонон зидди терроризм ва ифротгароӣ»-ро дар ҳамкорӣ бо намояндагии ТҶҶ «Созандагони Ватан» дар вилояти Суғд роҳандозӣ намояд. Дар назар аст, ки дар шаҳри Истаравшан, Исфара, ноҳияи Бобоҷон Ғафуров ва шаҳри Хуҷанд бо ширкати олимону донишмандон, ҷомеаи шаҳрвандӣ, кормандони мақомоти ҳифзи ҳуқуқ ва қишрҳои дигари ҷомеа чорабиниҳои мухталифи фарҳангию маърифатӣ ва мизҳои мудаввар аз рӯи мавзӯи «Омилҳои гаравидани ҷавонон ба гурӯҳҳои ифротӣ ва роҳҳои пешгирӣ аз он» гузаронида шаванд. Ҳамчунин вобаста ба ин масъала намояндагии ташкилоти ҷамъиятии ҷавонон «Созандагони Ватан» дар вилояти Суғд тасмим гирифтааст, ки 10-уми августи соли равон дар маҷлисгоҳи Кумитаи иҷроияи вилоятии ҲХДТ бо ширкати ҷавонони фаъоли вилоят таҳти унвони «Терроризм ва ифротгароиро маҳкум мекунем» мизи мудаввар баргузор намояд. Мақсад аз ин иқдом баланд бардоштани маърифати сиёсии ҷавонон, огоҳ намудани онҳо аз хатарҳои рӯзафзуни ифротгароӣ, муайян намудани сабаб ва омилҳое, ки неруи бархе аз ҷавононро ба ин гурӯҳҳои тундрав таҳрик медиҳанд ва инчунин дарёфти роҳҳои нави мубориза бар зидди ин падидаи хатарзо мебошад.