Аз никоҳи хешутаборӣ қариб 4000 кӯдаки маъюб таваллуд шудааст

Душанбе, 08.07.2015. (АМИТ «Ховар», Лайло Тоирӣ).-  “То 1 январи соли 2015 шумораи умумии кўдакони  маъюбе, ки таҳти назорати диспансерӣ мебошанд,  26 043 нафарро ташкил медиҳад. Мутобиқи маълумотҳои пешакӣ маълум гардид, ки аз ин шумора қариб 4000 нафараш аз никоҳи хешутабории наздик мебошад”,-гуфт вазири тандурустӣ ва ҳифзи иҷтимоии аҳолӣ Нусратулло Салимзода имрӯз, 8 июл зимни нишасти матбуотӣ.

  Бо мақсади  расонидани кумаки махсус ба кўдакони дорои имконияти маҳдуд, ташхис ва барқарорсозии саломатии кўдакони гирифтори бемории “Аутизм” моҳи январи соли ҷорӣ бо дастгирии ташкилоти ғайридавлатии «Ирода» дар заминаи чор маркази саломатии шаҳри Душанбе ҳуҷраҳои «Дахолати саривақтӣ» кушода шуда, бо таҷҳизоти зарурии махсус таҷҳизонида шуданд. 

Бино ба гуфтаи вазир ба мутахассисони ин ҳуҷраҳо нигоҳубини кўдакони гирифтори бемории “Аутизм” омўзонида шуд.