Бадахшон: Боздиди вазири корҳои дохилӣ аз мавзеи осебдида

Душанбе, 20.07.2015. (АМИТ «Ховар»).-Рӯзи 19 июл вазири корҳои дохилӣ Раҳимзода Рамазон Ҳамро зимни сафари корӣ дар Вилояти Мухтори Кӯҳистони Бадахшон аз мавзеи осебдидаи деҳаи Барсеми ноҳияи Шуғнон дидан намуд.
Ёдовар бояд шуд, ки бар асари фаромадани ҳаҷми калони сел ва банд шудани маҷрои дарёи «Ғунд» ҳаҷми оби кӯли сунъӣ, ки дар натиҷаи обхезии 17 июл ба вуҷуд омад, баланд гардида, дар натиҷаи  кандашавии садди ин кӯли сунъӣ 56 хонаи истиқоматӣ пурра хароб гашт, аз ҷумла дар деҳаи Барсем 41 адад, дар деҳаи Бердибекобод 3 адад ва дар деҳаи Колхозобод 12 хонаи истиқоматӣ пурра зарар дидааст. Аз ҷониби Президенти мамлакат ва Ҳукумати кишвар ба зарардидагон кумаки моддӣ расонида шуд.
Вазири корҳои дохилӣ Раҳимзода Рамазон Ҳамро бо мардуми махали аз офат осебдида вохӯрӣ доир намуда, аз аҳволи онҳо пурсон шуд.
Зикр гардид, ки аз ҷониби Ҳукумати Ҷумҳурии Тоҷикистон барои ҳалли мушкилоти онҳо ҳамаи тадбирҳои зарурӣ андешида мешаванд.
Сафари вазири корҳои дохилӣ Раҳимзода Рамазон Ҳамро дар Вилояти Мухтори Кӯҳистони Бадахшон идома дорад.