Дар Хуҷанд 5 донишҷӯи нашъаманд дастгир шуд

Хуҷанд, 14.07.15. (АМИТ «Ховар», Абдулаҳад  Шарифзода). – Кормандони Раёсати Агентии  назорати  маводи  нашъаовар  дар  вилояти  Суғд тайи нимсолаи  якуми соли  2015 – ум 28 ҷинояткории  марбут  ба   гардиши  ғайриқонунии  маводи  мухаддирро ошкор намуданд. 
Дар давраи зикршуда 44  нафар,  аз ҷумла  4  нафари қаблан маҳкумшуда  ва  1  шаҳрванди  хориҷӣ  барои  содир  намудани  ҷинояткориҳои  марбут ба  гардиши  ғайриқонунии  маводи  нашъаовар ба ҷавобгарии ҷиноятӣ  кашида шуданд. 
Дар  ҳамин  давра мақомоти  ҳифзи  ҳуқуқ ва   сохторҳои  дахлдори  вилоят  134  ҳодисаи  нашъаҷаллобиро  ошкор  намуда, 305  килограмму  964  грамм маводи  мухаддирро  мусодира  намуданд. 
Кормандони агентӣ  дар  ҳошияи  амалиёти «Кӯкнор»  12  ҳодисаи марбут ба   парвариши  растаниҳои нашъадорро ошкор  намуда, 164  ҳазору  981 буттаи бангдонаро бо усули  оташзанӣ нест  карданд. 
Дар  давраи  ҳисобот  дар  ҳудуди  вилоят як шаҳрванди  Афғонистон  дастгир  шуда,  аз  ӯ 11  килограмм  маводи  мухаддир  мусодира гардид.  Ғайр  аз  ин  5  нафар  донишҷӯёни  ду  донишкадаи  олии  Хуҷанд  бо  гумонбари  истеъмоли  доимии  маводи  мухаддир  дастгир  шуданд.