Дар музофоти Бадахшони Афғонистон 13 ҷангии «Толибон» кушта шуд

Душанбе, 28.07.2015. (АМИТ «Ховар»).- Рӯзи якшанбе дар натиҷаи зарбаи ҳавопаймоҳои афғонӣ дар ҳудуди шимолу шарқии музофоти Бадахшон зиёда аз 13 ҷангии «Толибон» маҳв карда шуд.
Амалиёти тозакунӣ бегоҳ дар минтақаи Вардуҷ баргузор гашт, ки ин минтақа вақтҳои охир майдони фаъоли бархӯрдҳои мусаллаҳона миёни ошӯбгарон ва кормандони ҳифзи ҳуқуқ гардидааст.
Бино ба гуфтаи мақомоти маҳаллӣ, бомбапартоӣ на танҳо ба кам кардани теъдоди ошӯбгарон, балки ба нест кардани анбори калони нигаҳдории аслиҳаи зеризаминӣ ва лавозимоти ҷангӣ низ имкон дод.
Тибқи иттилои оҷонсии Пажвок, бино ба гузориши полис чанде пештар аз  амалиёти тозакунӣ ҷангиёни «Толибон» ба маҳаллаи аҳолинишин аз мушак оташ кушоданд, ки дар натиҷа ду кӯдак ҳалок гашт.