Н. Салимзода: Бемориҳои аз ҳайвон ба одам гузаранда кам шудаанд

Душанбе, 08.07.2015. (АМИТ «Ховар», Лайло Тоирӣ).-  Дар шаш моҳи аввали соли равон  нишондиҳандаҳои бемориҳои тавассути об гузаранда, бо ваксина идорашаванда, бемориҳои шадиди роҳҳои нафас ва аз ҳайвонот ба одам гузаранда нисбат ба ҳамин давраи соли 2014 паст буда, аз натиҷаи чорабиниҳои зиддиэпидемикии саривақтӣ гувоҳӣ медиҳанд. Ин нуктаро имрӯз, 8 июл зимни нишасти матбуотӣ вазири тандурустӣ ва ҳифзи иҷтимоии аҳолӣ Нусратулло Салимзода ироа намуд. 
Бино ба гуфтаи вазир дар ҳамин давра аз тарафи мутахассисони марказҳои назорати давлатии санитарию эпидемиологии вилоятҳо ва  шаҳру  ноҳияҳо дар иншооти зериназоратӣ оид ба риояи талаботи санитарию эпидемиологӣ 24480 санҷиш гузаронида,  нисбат ба 6309  нафар протокол тартиб дода шуда, ба маблағи   676 895  сомонӣ ҷарима баста шудааст. Инчунин фаъолияти 584 иншоот муваққатан боздошта шуда, 308 нафар ҳомилони бемориҳои сироятӣ муввақатан то табобат ёфтан аз кор озод  шудаанд.