Оғози мулоқоту музокироти сатҳи олӣ миёни Тоҷикистону Ҳиндустон

Душанбе, 13.07.2015. (АМИТ “Ховар”). — Баррасии масоили вобаста ба таҳкими муносиботи дӯстӣ ва густариши ҳамкории судбахши Тоҷикистону Ҳиндустон нахуст дар мулоқоти хосаи Президенти Ҷумҳурии Тоҷикистон Эмомалӣ Раҳмон ва Сарвазири Ҷумҳурии Ҳиндустон  Нарендра Модӣ оғоз ёфт.
Президенти Ҷумҳурии Тоҷикистон Эмомалӣ Раҳмон Сарвазири Ҷумҳурии Ҳиндустон  Нарендра Модро бори дигар хайра мақдам гуфта, аз сатҳ ва муҳтавои муносиботи ду кишвари дӯст изҳори қаноат кард.
Сарвазири Ҷумҳурии Ҳиндустон  Нарендра Модӣ бо таваҷҷуҳ ба мақоми муносиби Тоҷикистон дар муносиботи хориҷии кишвараш изҳори бовар намуд, ки сафари давлатиаш ба Тоҷикистон дар роҳи таҳким ва густариши робитаҳои ду кишвар нақши намоён мегузорад.
Хотиррасон бояд намуд, ки аз рӯи натиҷаҳои мулоқоту музокироти сатҳи олӣ ба имзо расидани се санади нав доир ба густариши ҳамкорӣ дар соҳаҳои гуногун, аз ҷумла дар бахшҳои сиёсат, иқтисоду тиҷорат, маориф ва фарҳанг дар назар аст.