Шумораи шаҳрвандони дар хориҷи кишвар дастгиршуда 30 фоиз кам шудааст

Душанбе, 29.07.2015. (АМИТ «Ховар»).-Дар давоми шаш моҳи соли ҷорӣ мақомоти ҳифзи ҳуқуқ ва сохторҳои қудратии ҷумҳурӣ аз муомилоти ғайриқонунӣ 2 т. 909 кг. 762 гр. маводи нашъаоварро мусодира намуданд, ки аз ин 363 кг. 8 гр. героин, 787 кг. 167 гр. афюн, 1 704 кг. 477 гр. ҳашиш ва 555 кг. 81 гр. бангдона мебошад, -гуфт зимни нишасти матбуотӣ директори Агентии назорати маводи нашъаовари назди Президенти ҶТ Рустам Назарзода имрӯз, 29 июл.
Агарчанде вазни умумии маводи нашъаовари мусодирашуда дар муқоиса бо нимсолаи аввали соли 2014 11,4% коҳиш ёфтааст, мутаассифона, мусодираи афюн ба 8 фоиз ва героин 48,9 фоиз (дар нисбат ба 6 моҳи аввали соли 2014) зиёд шудааст.
Мувофиқи маълумоти ба АМИТ «Ховар» пешниҳодшуда дар давраи ҳисоботӣ дар ҳудуди ҷумҳурӣ 567 ҷиноят вобаста ба маводи нашъаовар ба қайд гирифта шудааст, ки ин дар муқоиса бо ҳамин давраи соли 2014 9,7% кам мебошад. Ҳамчунин дар ин давра 202 шаҳрванди Тоҷикистон дар хориҷи кишвар дастгир шуданд, ки ин нишондод назар ба ҳамин давраи соли гузашта тақрибан 30% коҳиш ёфтааст.