Суғд: “Тарроҳи беҳтарини либосҳои миллӣ”-озмун

Душанбе, 3.07.2015. (АМИТ «Ховар», Ситораи Боймурод).- Бахшида ба 24 солагии Истиқлолияти давлатии Ҷумҳурии Тоҷикистон, инчунин Соли оила моҳи сентябри соли 2015 дар вилояти Суғд озмуни вилоятии “Тарроҳи беҳтарини либосҳои миллӣ” баргузор мешавад. Озмун бо мақсади иҷрои дастуру супоришҳои Президенти Ҷумҳурии Тоҷикистон барои баланд бардоштани ифтихори миллӣ, арҷгузорӣ ба фарҳанги волои миллӣ, тарбияи зебоипарастӣ ва тарғибу ташвиқи либосҳои миллӣ, тарғиби анъанаҳои миллӣ, эҳёи анъанаҳои дӯзандагии миллӣ, тарғиби либос аз матои табиии атласу адрас роҳандозӣ гардидааст.
Тавре ки дар ин бора Хадамоти матбуоти раиси вилояти Суғд хабар дод, дар озмун тарроҳон, дизайнерон, ва тамсиласозони либос аз шаҳру ноҳияҳои вилоят, новобаста аз синн, намудҳои гуногуни ташкилот ва соҳибкорони инфиродие, ки дар соҳаи хизматрасонии маишии аҳолӣ фаъолият мебаранд, иштирок карда метавонанд.
Гуфта мешавад, ки озмуни мазкур байни тарроҳ — тамсиласозон ва дизайнерони либос аз рӯи номгӯйҳои “Беҳтарин либоси рӯзмарра бо унсурҳои миллӣ”, “Беҳтарин либоси идона бо унсурҳои миллӣ”, “Беҳтарин либоси арӯсон бо унсурҳои миллӣ”, “Беҳтарин либоси кории кормандони соҳаи хизматрасонӣ” гузаронида мешавад ва ғолибон бо мукофотпулии Мақомоти иҷроияи ҳокимияти давлатии вилояти Суғд дар ҳаҷми аз 500 то 2000 сомонӣ сарфароз гардонида мешаванд.
Ҳамзамон ба нафаре, ки дар бахши “Тарроҳи беҳтарини соли 2015” ғолиб меояд, 3 000 сомонӣ мукофотпулӣ дода мешавад.