Таъсиси Маҳфили донишҷўёни тоҷик дар хориҷ аз кишвар

Душанбе, 16.07.2015 (АМИТ «Ховар», Фарзонаи Давлат).-Имрӯзҳо беш аз 12 ҳазор ҷавони соҳибистеъдоду лаёқатманди мо дар хориҷи кишвар таҳсил дошта, аксари ҷавонони бонангу номуси кишвар дар пайи таҳсил, интихоби касб ва аз худ кардани техникаву технологияҳои муосир талош доранд.
Бо ин мақсад иттиҳодияи ихтиёрии ҷавонони тоҷике, ки дар хориҷи кишвар таҳсил доранд, дар назди Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон  бо фармоиши раиси кумита таъсис шуда ва фаъолият дорад.
Бино ба гуфтаи роҳбари иттиҳодияи мазкур Толиб Амиров, ҳадафи асосии маҳфил- баланд бардоштани номи Тоҷикистон дар хориҷ аз кишвар буда, ҳадафи дигараш муттаҳид сохтани ҷавонон ва таблиғи дастовардҳои воқеии кишвар дар роҳи бунёди ҷомеаи демократӣ ва ҳуқуқбунёд, ҳамоҳанг сохтан, дастгирӣ ва ҳавасманд гардонидани ҷавонони дар хориҷи кишвар таҳсилдошта барои таҳсили пурмаҳсул ва хизмати шоён барои давлату миллати хеш мебошад.
Ҳамчунин дар назди кумита «Маҳфили донишҷўён» низ фаъолият дорад, ки аз ҷониби ҷавонони дар хориҷи кишвар таҳсилдошта таъсис  шудааст. 
 Уҳдадориҳои ин маҳфил иштироки фаъол дар амалӣ намудани чорабиниҳои маҳфил ва натиҷаи ноилшаванда — муттаҳид гардидани ҷавонони дар хориҷи кишвар таҳсилдошта, дарёфти кадрҳои болаёқат, ташаккули ваҳдату ҳамдилӣ миёни донишҷӯёни мазкур ва пуштибонӣ аз сиёсати давлатии Ҷумҳурии Тоҷикистон мебошад.
Гуфта мешавад, рӯзҳои наздик сомонаи расмии маҳфил фаъол мешавад, ки ба воситаи он фаъолият ва дастоварди донишҷӯёне, ки дар хориҷ аз кишвар таҳсил доранд, интишор мегарданд.